മലപ്പുറം: ലോകമെമ്പാടുമുള്ള ഫുട്ബോൾ പ്രേമികളുടെ നെഞ്ചിടിപ്പായ മലപ്പുറത്തിന്റെ കൽപന്തുകളി ആവേശം ഇപ്പോൾ അതിരുകൾ കടന്ന് അറബ് നാട്ടിലും തരംഗമാവുകയാണ്. സൗദി അറേബ്യൻ ദേശീയ ഫുട്ബോൾ ടീമിന് പിന്തുണ പ്രഖ്യാപിച്ച് മലപ്പുറത്ത് ഉയർന്ന കൂറ്റൻ ഫ്ലെക്സ് ബോർഡാണ് ഇപ്പോൾ സൗദിയിലെ പ്രമുഖ മാധ്യമങ്ങളിൽ വാർത്തയായിരിക്കുന്നത്.
മലപ്പുറം പാലത്തിങ്ങലിലെ ‘ബി ടീം സൗഹൃദ കൂട്ടായ്മ’ സ്ഥാപിച്ച ഫ്ലെക്സ് ബോർഡാണ് അറബ് പത്രങ്ങളുടെ ശ്രദ്ധ പിടിച്ചുപറ്റിയത്. സൗദി കിരീടാവകാശി മുഹമ്മദ് ബിൻ സൽമാൻ രാജകുമാരന്റെയും സൗദി ദേശീയ ഫുട്ബോൾ ടീം അംഗങ്ങളുടെയും ചിത്രങ്ങൾ ഉൾക്കൊള്ളുന്നതാണ് ഈ കൂറ്റൻ ബോർഡ്.
കേരളക്കരയിലെ, പ്രത്യേകിച്ച് മലപ്പുറത്തെ ഫുട്ബോൾ പ്രേമികൾക്ക് മറ്റ് വിദേശ രാജ്യങ്ങളിലെ ടീമുകളോടുള്ള സ്നേഹവും കളിഭ്രാന്തും എത്രത്തോളമുണ്ടെന്ന് വ്യക്തമാക്കുന്നതാണ് ഈ വാർത്തയെന്ന് സൗദി മാധ്യമങ്ങൾ റിപ്പോർട്ട് ചെയ്യുന്നു. ഗൾഫ് നാടുകളുമായി അടുത്ത ബന്ധം പുലർത്തുന്ന മലപ്പുറത്തുകാരുടെ ഈ ഫുട്ബോൾ സ്നേഹം പ്രവാസികൾക്കിടയിലും വലിയ ചർച്ചയായി മാറിക്കഴിഞ്ഞു.
