വിശാഖപട്ടണം: ഇന്ത്യൻ നാവികസേനയുടെ കരുത്ത് പതിന്മടങ്ങ് വർദ്ധിപ്പിച്ചുകൊണ്ട് തദ്ദേശീയമായി നിർമ്മിച്ച മൂന്നാമത്തെ ആണവ സബ്മറൈൻ ‘ഐ.എൻ.എസ് അരിധമൻ’ ഇന്ന് കമ്മീഷൻ ചെയ്യും. ശത്രുക്കളെ അടിച്ചമർത്തുന്നവൻ എന്നർത്ഥമുള്ള ‘അരിധമൻ’ എന്ന പേരിനെ അന്വർത്ഥമാക്കുന്ന അത്യാധുനിക സജ്ജീകരണങ്ങളുമായാണ് ഈ പോരാളി കടലിലിറങ്ങുന്നത്.
അരിധമന്റെ വരവോടെ ഇന്ത്യയുടെ ‘ന്യൂക്ലിയർ ട്രയാഡ്’ (Nuclear Triad) കൂടുതൽ സുരക്ഷിതമാകും. കരയിൽ നിന്നും വായുവിൽ നിന്നും കടലിൽ നിന്നും ഒരേസമയം ആണവാക്രമണം നടത്താനുള്ള കഴിവിനെയാണ് ഇത് സൂചിപ്പിക്കുന്നത്. ഒരു ശത്രുരാജ്യം ഇന്ത്യയെ ആദ്യം ആക്രമിച്ചാലും, സമുദ്രത്തിനടിയിൽ അദൃശ്യനായിരിക്കുന്ന അരിധമന് ശക്തമായി തിരിച്ചടി നൽകാൻ സാധിക്കും (Second Strike Capability).
ഇൻഡോ-പസഫിക് മേഖലയിൽ ചൈനയുടെ കടന്നുകയറ്റം വർദ്ധിച്ചുവരുന്ന സാഹചര്യത്തിൽ അരിധമന്റെ കമ്മീഷനിംഗ് ഇന്ത്യയുടെ സമുദ്രാതിർത്തി സംരക്ഷണത്തിന് വലിയ മുതൽക്കൂട്ടാകും.
“വാക്കല്ല, ശക്തിയാണ് അരിധമൻ!” എന്ന് പ്രതിരോധ മന്ത്രി രാജ്നാഥ് സിംഗ് സോഷ്യൽ മീഡിയയിലൂടെ കുറിച്ചു. ഇന്ന് വിശാഖപട്ടണത്ത് നടക്കുന്ന ചടങ്ങിൽ ഐ.എൻ.എസ് താരാഗിരി എന്ന യുദ്ധക്കപ്പലും നാവികസേനയുടെ ഭാഗമാകും.
