കണ്ണൂർ: കണ്ണൂർ റെയിൽവേ സ്റ്റേഷനിൽ എക്സൈസ് സംഘവും റെയിൽവേ സംരക്ഷണ സേനയും (RPF) ചേർന്ന് നടത്തിയ സംയുക്ത പരിശോധനയിൽ വൻ കഞ്ചാവ് വേട്ട. റെയിൽവേ സ്റ്റേഷനിലെ രണ്ടാം നമ്പർ പ്ലാറ്റ്ഫോമിൽ നിന്നാണ് ഏകദേശം 18 കിലോഗ്രാം കഞ്ചാവ് പിടികൂടിയത്.
കണ്ണൂർ എക്സൈസ് സ്പെഷ്യൽ സ്ക്വാഡും ആർ.പി.എഫും സംയുക്തമായി നടത്തിയ പ്രത്യേക റെയ്ഡിലാണ് ഈ വൻ കഞ്ചാവ് ശേഖരം കണ്ടെടുത്തത്. കണ്ണൂർ ആർ.പി.എഫ് ഇൻസ്പെക്ടർ ജെ. വർഗീസ്, സ്പെഷ്യൽ സ്ക്വാഡ് എക്സൈസ് ഇൻസ്പെക്ടർ എസ്. സിയാദ് എന്നിവരുടെ സംയുക്ത നേതൃത്വത്തിലായിരുന്നു റെയ്ഡ് സംഘടിപ്പിച്ചത്.
കണ്ടെടുത്ത കഞ്ചാവ് റെയിൽവേ സ്റ്റേഷൻ വഴി കടത്താൻ ശ്രമിച്ചതിന് പിന്നിൽ ആരാണെന്ന് കണ്ടെത്താനായി അധികൃതർ അന്വേഷണം ഊർജ്ജിതമാക്കിയിട്ടുണ്ട്. ട്രെയിൻ മാർഗ്ഗം കേരളത്തിലേക്ക് വൻതോതിൽ ലഹരിമരുന്ന് ഒഴുകുന്നു എന്ന രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. വരും ദിവസങ്ങളിലും സ്റ്റേഷൻ പരിസരങ്ങളിലും ട്രെയിനുകളിലും പരിശോധന ശക്തമാക്കുമെന്ന് അധികൃതർ അറിയിച്ചു.
