തിരുവനന്തപുരം: വരാനിരിക്കുന്ന ബക്രീദ് (ഈദുൽ അസ്ഹ) പ്രമാണിച്ച് ഉപഭോക്താക്കൾക്കായി പ്രത്യേക കിറ്റുമായി സപ്ലൈകോ. വിപണി വിലയേക്കാൾ വൻ ലാഭത്തിലാണ് സപ്ലൈകോ ഈ ഉത്സവകാല കിറ്റ് പൊതുജനങ്ങൾക്ക് മുന്നിൽ എത്തിക്കുന്നത്.
പൊതുവിപണിയിൽ 1101 രൂപ വിലവരുന്ന 10 ഇനം അവശ്യസാധനങ്ങൾ അടങ്ങിയ പ്രത്യേക കിറ്റാണ് സപ്ലൈകോ വഴി കേവലം 850 രൂപയ്ക്ക് ലഭ്യമാക്കുന്നത്. ഇതുവഴി ഒരോ കിറ്റിലും ഉപഭോക്താക്കൾക്ക് 250 രൂപയിലധികം ലാഭിക്കാൻ സാധിക്കും.
ഈ വരുന്ന മേയ് 26 വരെ സപ്ലൈകോയുടെ തിരഞ്ഞെടുക്കപ്പെട്ട സൂപ്പർമാർക്കറ്റുകളിലും ഔട്ട്ലെറ്റുകളിലും ഈ കിറ്റ് വാങ്ങാൻ സാധിക്കുന്നതാണ്. ഉത്സവകാലത്ത് പൊതുവിപണിയിലെ വിലക്കയറ്റം തടയുന്നതിനും സാധാരണക്കാർക്ക് ആശ്വാസം പകരുന്നതിനുമാണ് സപ്ലൈകോയുടെ ഈ സവിശേഷ ഇടപെടൽ.
