സിനിമാ സംവിധായകൻ പ്രശാന്ത് കാനത്തൂരിന്റെ മകൻ ബംഗ്ളൂരുവിൽ മരിച്ച നിലയിൽ; വിടവാങ്ങിയത് യുവ കമ്പ്യൂട്ടർ ഗെയിം ഡിസൈനർ

കാസർകോട്: സിനിമാ സംവിധായകനും ചെന്നൈയിലെ പത്രപ്രവർത്തകനുമായ പ്രശാന്ത് കാനത്തൂരിൻ്റെ മകൻ
അനിരുദ്ധ് എന്ന കണ്ണ(22)നെ ബംഗ്ളൂരുവിലെ താമസ സ്ഥലത്ത് തൂങ്ങി മരിച്ച നിലയിൽ കണ്ടെത്തി. വിവരമറിഞ്ഞ് ബന്ധുക്കൾ ബംഗ്ളൂരുവിലേയ്ക്ക് പോയിട്ടുണ്ട്. കമ്പ്യൂട്ടർ ഗെയിം ഡിസൈനിംഗ് പരിശീലനം കഴിഞ്ഞ അനിരുദ്ധൻ മാസങ്ങൾക്കു മുമ്പാണ് ബംഗ്ളൂരുവിലെ ഒരു കമ്പനിയിൽ ജോലിയിൽ പ്രവേശിച്ചത്. രണ്ടു ദിവസമായി ജോലിക്ക് ഹാജരാകാത്തതിനെ തുടർന്ന് സഹജീവനക്കാർ താമസ സ്ഥലത്ത് എത്തിയപ്പോൾ തൂങ്ങി നിൽക്കുന്ന നിലയിൽ കാണുകയായിരുന്നുവെന്നാണ് നാട്ടിൽ ലഭിച്ചിട്ടുള്ള വിവരം. കൂടുതൽ വിവരങ്ങൾ അറിവായിട്ടില്ല. മൃതദേഹം മോർച്ചറിയിലേയ്ക്ക് മാറ്റി. മായയാണ് അനിരുദ്ധിൻ്റെ മാതാവ്. ചെന്നൈയിൽ വിദ്യാർത്ഥിനിയായ ഐശ്വര്യ ഏക സഹോദരിയാണ്.