തട്ടിപ്പുകൾ ഇനി എളുപ്പത്തിൽ പിടിക്കപ്പെടും! രാജ്യത്തെ എല്ലാ മൊബൈൽ ഫോണുകളിലും സഞ്ചാർ സാഥി ആപ്പ് നിർബന്ധമാക്കി കേന്ദ്രസർക്കാർ

ന്യൂഡൽഹി: രാജ്യത്തെ എല്ലാ മൊബൈൽ ഫോണുകളിലും സഞ്ചാർ സാഥി ആപ്പ് നിർബന്ധമാക്കി കേന്ദ്രസർക്കാർ. ആപ്പിൾ, സാംസങ്, വിവോ, ഓപ്പോ എന്നിവയുൾപ്പെടെ എല്ലാ പ്രമുഖ സ്‌മാർട്ട് ഫോൺ കമ്പനികളും സർക്കാർ ഉടമസ്ഥതയിലുള്ള സൈബർ സുരക്ഷാ ആപ്ലിക്കേഷനായ സഞ്ചാർ സാഥി മുൻകൂട്ടി ഇൻസ്റ്റാൾ ചെയ്യണമെന്നാണ്
ടെലികമ്മ്യൂണിക്കേഷൻ മന്ത്രാലയം കഴിഞ്ഞദിവസം പുറത്തിറക്കിയ ഉത്തരവിൽ പറയുന്നത്. ഉത്തരവ് പ്രകാരം, സ്‌മാർട്ട് ഫോൺ കമ്പനികൾക്ക് ഇത് പാലിക്കാൻ 90 ദിവസത്തെ സമയം നൽകിയിട്ടുണ്ട്. ഉപയോക്താക്കൾക്ക് അത് പ്രവർത്തനരഹിതമാക്കാൻ കഴിയാത്ത വിധത്തിൽ ആപ്പ് ഇൻസ്റ്റാൾ ചെയ്യണമെന്നും നിർദ്ദേശത്തിൽ വ്യക്തമാക്കുന്നു.
എന്താണ് സഞ്ചാർ സാഥി ആപ്പ് ?
2023 മെയ് മാസത്തിൽ അവതരിപ്പിച്ച ഒരു സർക്കാർ വെബ് സൈറ്റിൻ്റെ മെച്ചപ്പെടുത്തിയ പതിപ്പാണ് സഞ്ചാർ സാഥി. ഈ വർഷം ആദ്യം, ജനുവരിയിൽ, ആൻഡ്രോയിഡ്, ഐ ഒ എസ് ഉപകരണങ്ങൾക്കായി ടെലികമ്മ്യൂണിക്കേഷൻ വകുപ്പ് ഒരു മൊബൈൽ ആപ്പും പുറത്തിറക്കി. മൊബൈൽ ഫോൺ തട്ടിപ്പും മോഷണവുമായി ബന്ധപ്പെട്ട പ്രശ്‌നങ്ങൾ കൈകാര്യം ചെയ്യുന്നതിനും റിപ്പോർട്ട് ചെയ്യുന്നതിനും ഉപയോക്താക്കളെ സഹായിക്കുന്നതിനാണ് ഈ ആപ്പ് രൂപകൽപ്പന ചെയ്തിരിക്കുന്നത്.
നിരവധി പ്രധാന പ്രവർത്തനങ്ങൾ ആപ്പ് വാഗ്ദാനം ചെയ്യുന്നു:
മോഷണം/നഷ്ടം തടയുക: ഈ ആപ്പ് വഴി രാജ്യത്തെ എല്ലാ ടെലികോം നെറ്റ് വർക്കുകളിലും നഷ്ടപ്പെട്ടതോ മോഷ്ടിക്കപ്പെട്ടതോ ആയ മൊബൈൽ ഫോണുകൾ ഉപയോക്താക്കൾക്ക് ബ്ലോക്ക് ചെയ്യാൻ കഴിയും. ഇന്ത്യയിലെവിടെയും ബ്ലോക്ക് ചെയ്‌ത ഫോൺ ഉപയോഗിക്കുകയാണെങ്കിൽ, അതിൻ്റെ സ്ഥാനം കണ്ടെത്താൻ നിയമ നിർവ്വഹണ ഏജൻസികളെ ഇത് സഹായിക്കുന്നു.ചക്ഷു ഫീച്ചർ: വഞ്ചനാപരമായ കോളുകൾ, എസ്.എം.എസ് അല്ലെങ്കിൽ വാട്ട്സ് ആപ്പ് സന്ദേശങ്ങൾ നേരിട്ട് അധികാരികൾക്ക് റിപ്പോർട്ട് ചെയ്യാൻ ഉപയോക്താക്കളെ അനുവദിക്കുന്നു.
കണക്ഷനുകൾ കൈകാര്യം ചെയ്യുക: ഉപയോക്താക്കൾക്ക് അവരുടെ പേരിൽ രജിസ്റ്റർ ചെയ്‌തിട്ടുള്ള എല്ലാ മൊബൈൽ നമ്പറുകളും പരിശോധിക്കാനും അാതമോ അനധികൃതമോ ആയ കണക്ഷനുകൾ റിപ്പോർട്ട് ചെയ്യാനും കഴിയും.
സ്വന്തം മൊബൈലിനെ കുറിച്ച് അറിയുക (KYM): ഈ സവിശേഷത ഉപയോക്താക്കളെ അവരുടെ സ്‌മാർട്ട് ഫോണിന്റെ ആധികാരികത പരിശോധിക്കാൻ അനുവദിക്കുന്നു.
സൈബർ സുരക്ഷാ ഭീഷണികളെ ചെറുക്കാൻ ലക്ഷ്യമിടുന്നു
എല്ലാ പ്രധാന സ്‌മാർട്ട് ഫോൺ ബ്രാൻഡുകളിലും സഞ്ചാർ സതി ആപ്പ് പ്രീലോഡ് ചെയ്യുന്നതിലൂടെ, വലിയ തോതിലുള്ള തട്ടിപ്പുകൾക്കും നെറ്റ് വർക്ക് ദുരുപയോഗത്തിനും സഹായിക്കുന്നതായി ആരോപിക്കപ്പെടുന്ന ഡ്യൂപ്ലിക്കേറ്റ് അല്ലെങ്കിൽ വ്യാജ IMEI നമ്പറുകൾ ഉയർത്തുന്ന ഗുരുതരമായ ടെലികോം സൈബർ സുരക്ഷാ ഭീഷണിയെ നേരിടാൻ സർക്കാർ ലക്ഷ്യമിടുന്നതായി റിപ്പോർട്ടുണ്ട്.
15 അക്ക IMEI നമ്പർ പോലുള്ള മൊബൈൽ ഫോണുകളിലെ പ്രധാനപ്പെട്ട തിരിച്ചറിയൽ നമ്പറുകൾ മാറ്റാൻ ആരെങ്കിലും ശ്രമിച്ചാൽ, 2023 ലെ ടെലികമ്മ്യൂണിക്കേഷൻസ് ആക്ട് പ്രകാരം അത് ഗുരുതരമായ കുറ്റകൃത്യമായി കണക്കാക്കപ്പെടുന്നു. ഇത് മൂന്ന് വർഷം വരെ തടവും 50 ലക്ഷം രൂപ വരെ പിഴയും അല്ലെങ്കിൽ രണ്ടും കൂടിയും ഉൾപ്പെടെയുള്ള പിഴകൾക്ക് കാരണമാകും.
കൂടാതെ, നിങ്ങളുടെ ഫോൺ സജ്ജീകരിച്ച നിമിഷം മുതൽ തന്നെ സഞ്ചാർ സതി കണ്ടെത്താനും ഉപയോഗിക്കാനും എളുപ്പമാണെന്ന് ഉറപ്പാക്കാൻ ടെലികമ്മ്യൂണിക്കേഷൻ വകുപ്പ് (DoT) മൊബൈൽ ഫോൺ കമ്പനികൾക്ക് നിർദ്ദേശം നൽകിയിട്ടുണ്ട്. ഉപയോക്താക്കളെ സഹായിക്കുന്നതിന് ഈ ആപ്പ് മികച്ച രീതിയിൽ തന്നെ പ്രവർത്തിക്കും.